Шпанската влада поднесе закон за забрана на пушење на отворени места, вклучувајќи плажи, барови, ресторани, автобуски станици и стадиони. Забраната ќе се однесува и на електронските цигари, кои се сè попопуларни кај младите.

„Секогаш ќе го ставаме јавното здравје пред приватните интереси. Секој има право да дише чист воздух и да живее подолг и подобар живот“, изјави министерката за здравство Моника Гарсија.

Угостителскиот сектор го критикуваше законот, бидејќи надворешните тераси, кои се користат во текот на целата година, се популарни кај пушачите. Пушењето во затворен простор е забрането од 2011.
Сличен закон беше донесен во Франција во јули, но забраната не ги вклучи терасите на кафулињата и електронските цигари.

Над 50.000 луѓе умираат секоја година во Шпанија од причини поврзани со пушењето или околу 137 дневно, покажуваат податоците на Министерството за здравство.