„Уште сум тука“ на прочуениот бразилски автор Валтер Салјес ја доби годинешната награда Гран при за најдобар филм на годината што традиционално ја доделува Меѓународната федерација на филмски критичари-ФИПРЕСЦИ. Салјес лично ја прими наградата на отворањето на 73. издание на филмскиот фестивал во Сан Себастијан.

Гран при на ФИПРЕСЦИ се избира со гласање на членовите на федерацијата, а годинава гласаа 739 критичари од 75 земји. ФИПРЕСЦИ гоинава слави 100 години постоење и е едно од најстарите професионални здруженија во светот.

Примајќи ја наградата, режисерот Салјес за „Уште сум тука“, политичка биографска драма во бразилско-француска копродукција, рече дека е филм за „сеќавањето и отпорот“ и се заблагодари на членовите на ФИПРЕСЦИ што се „толку витални сојузници во борбата против заборавот и во одбраната на демократијата“.

„Уште сум тука“ годинава освои Оскар за најдобар странски филм, а беше номиниран и за Најдобар филм и  за Најдобра актерка за Фернанда Торес, а во 2024 во Венеција е награден за најдобро сценарио.