Нема пореметување на летовите на унгарската нискобуџетна компанија „Визер“ од аеродромите во Скопје и Охрид. Компанијата преку нејзините официјални страници на социјалните мрежи објави соопштение, во кое се вели дека е извршено ажурирање на софтверите на сите авиони од фамилијата „ербас 320“.
„Ажурирањето на софтверот успешно е имплементирано во текот на ноќта на сите засегнати авиони од фамилијата ‘ербас А320‘. Сите летови се одвиваат без прекини“, соопштија од авиокомпанијата.
Компанијата „Визер“, која во базата на Скопскиот аеродром има стационирано пет авиони од типот „ербас А321 нео“ и одржува околу 60 проценти од вкупниот авиосообраќај во Македонија, лета исклучиво со флота од фамилијата „ербас 320“.
„Ербас“ најави дека ќе приземји илјадници авиони откако било утврдено дека силна сончева радијација може да влијае врз компјутерите за контрола на летот во авионот, што доведе до одложувања низ целиот свет. Се верува дека ќе бидат погодени околу 6.000 авиони, половина од светската флота на оваа компанија, но тие ќе се вратат во функција по брзо ажурирање на софтверот.
„Ербас“ објави дека го открил проблемот за време на истрага на инцидент од минатиот месец, во кој авион кој летал од САД до Мексико нагло изгубил висина. Авионот на авиокомпанијата „ЏетБлу“ принудно слетал во Флорида, при што биле повредени најмалку 15 луѓе.
А. АНТЕВСКА
