Шефот на Светската здравствена организација, Тедрос Аданом Гебрејесус, го рече „бесмислен“ нападот врз градинка и болница во Судан, во кој, според него, загинаа 114 лица. Дронови беа употребени за напад врз објектите на 4 декември во градот Калоги, во регионот Јужен Кордофан, при што ОН соопшти дека меѓу загинатите има 63 деца.

Локалниот функционер Есам ал-Дин ал-Сајед, раководител на административната единица Калоги, за новинската агенција АФП изјави дека нападите со беспилотни летала погодиле „прво градинка, потоа болница и трет пат додека луѓето се обидувале да ги спасат децата“.

Силите за брза поддршка (РСФ), една од страните во беснеечката граѓанска војна во земјата, беа обвинети и од нивниот непријател, армијата, и од медицинската организација, Суданската лекарска мрежа, за организирање на нападот. Немаше непосреден коментар од РСФ, кои во минатото негираа дека им наштетиле на цивилите, но беа обвинети од Тедрос во октомври за убиство на стотици цивили во главната болница во градот Ел-Фашер во Дарфур.

Во друг развој на настаните, РСФ ја презеде контролата врз најголемото нафтено поле во земјата, Хеглиг. Судан е опустошен од војна од април 2023, кога избувна борба за власт меѓу РСФ и армијата, кои порано беа сојузници. Сместен помеѓу главниот град на Судан, Картум, и Дарфур, регионот составен од Северен Кордофан, Јужен Кордофан и Западен Кордофан беше фронтовска линија во граѓанската војна.

Битката за Кордофан – со население од речиси осум милиони – се интензивираше додека армијата се движи кон Дарфур, кој е под контрола на РСФ. Првичните извештаи сугерираа дека најмалку 50 лица, меѓу кои 33 деца, се убиени во Калоги, кој е под контрола на армијата. Според системот за следење на нападите врз здравствената заштита на СЗО, 114 загинаа, а 35 беа повредени.