Реза Пахлави, пребегнатиот син на покојниот ирански шах, го повика Доналд Трамп да биде подготвен да интервенира за да им помогне на Иранците, додека бројот на загинати во речиси двонеделните антивладини протести порасна на најмалку 62.

„Господине претседателе, ова е итен и непосреден апел за ваше внимание, поддршка и акција. Луѓето повторно ќе бидат на улиците, ве молам да помогнете“, напиша Пахлави на Икс.

Пахлави, кој живее во областа на Вашингтон, ги охрабрува Иранците да протестираат, иако не е јасно колкава поддршка има меѓу демонстрантите.

Иран денеска навести дека безбедносните сили ќе ги разбијат протестите, предизвикувајќи го Трамп, кој кажа дека ќе им помогне на оние кои мирно демонстрираат. Протестите траат веќе 12 дена откако почнаа поради крахот на иранската валута, проширувајќи се во повеќе од 100 градови во сите 31 провинција. Државата е веќе 24 часа без интернет, телефонските повици надвор од земјата се недостапни, а летовите се откажани.

„Трамп има раце извалкани со крвта на Иранците. Демонстрантите ги уништуваат сопствените улици за да му угодат на претседателот на Соединетите Американски Држави затоа што рече дека ќе им дојде напомош. Наместо тоа, треба да обрне внимание на состојбата на сопствената земја“, изјави иранскиот врховен водач ајатолахот Али Хаменеи.

Шефот на иранското судство Голамхосеин Мохсени-Еџеи вети дека „казната за демонстрантите ќе биде одлучувачка, максимална и без никаква правна попустливост“, а Револуционерната гарда издаде соопштение во кое се вели дека нема да толерира продолжување на сегашната ситуација во земјата.

Засега нема одговор од Вашингтон, иако Трамп го повтори своето ветување дека ќе го нападне Иран доколку бидат убиени демонстранти.

Иако Иран е отсечен од светот, на интернет се појавија видеа од протестите, на кои се гледаат палежи и толпи луѓе како маршираат по улиците, скандирајќи против иранската влада.

Иран претходно задушуваше многу поголеми немири, но сега се соочува со потешка економска ситуација и засилен меѓународен притисок со повторно воведените санкции поради неговата нуклеарна програма. Иранската државна телевизија ги предупредува родителите да не им дозволуваат на своите деца да се приклучат на протестите, нарекувајќи ги демонстрантите „терористи“.