Авиокомпаниите пренасочуваат и откажуваат некои летови низ Блискиот Исток, бидејќи тензиите меѓу Иран и САД се зголемуваат, а претседателот Доналд Трамп завчера изјави дека САД имаат поморска „армада“ што се движи кон Иран. Висок ирански функционер вчера изјави дека Иран ќе го третира секој напад „како тотална војна против нас“, пред пристигнувањето на американскиот воен носач на авиони и други средства на Блискиот Исток во наредните денови.
Регулаторот за воздухопловство на Европската Унија на 16 јануари им препорача на европските авиокомпании да останат надвор од воздушниот простор на Иран, бидејќи тензиите се зголемија поради смртоносното задушување на протестите од власта во Техеран и заканите за интервенција од САД.
КЛМ: Авиокомпанијата КЛМ ќе избегнува летање над големи делови од Блискиот Исток до понатамошно известување поради зголемените тензии таму, соопшти денеска холандската филијала на авиокомпанијата „Ер Франс КЛМ“.
„Како мерка на претпазливост, со оглед на геополитичката ситуација, КЛМ нема да лета низ воздушниот простор на Иран, Ирак и Израел и нема да лета над неколку земји во регионот на Заливот“, изјави портпаролот на КЛМ.
„Ер Франс“: „Ер Франс“ денеска ги продолжи своите летови до Дубаи, откако ги суспендираше еден ден претходно, велејќи дека ја следи ситуацијата на Блискиот Исток „во реално време“.
„Ер Франс континуирано ја следи геополитичката ситуација на териториите опслужувани и надлетувани од нејзините авиони“, се вели во соопштението.
„Луфтханза“: „Луфтханза“ на 14 јануари изјави дека ќе го заобиколи иранскиот и ирачкиот воздушен простор до понатамошно известување и дека ќе врши само дневни летови до Тел Авив и Аман помеѓу 14 јануари и 19 јануари. Некои летови би можеле да бидат откажани како резултат на овие дејствија, додаде компанијата во соопштението истиот ден.
„Бритиш ервејс“: „Бритиш ервејс“ привремено ги прекина летовите до Бахреин на 16 јануари како превентивна мерка, велејќи дека „продолжува внимателно да ја следи ситуацијата во регионот“. Летовите до Бахреин денеска повторно беа достапни на веб-страницата на „Бритиш ервејс“, а портпарол на авиокомпанијата рече дека сите нејзини летови се одвиваат според распоредот.
„Финер“: „Финер“ изјави во соопштението на 16 јануари дека престанала да лета низ ирачкиот воздушен простор, наместо тоа летаји до Доха и Дубаи над Саудиска Арабија. Компанијата веќе го избегнуваше иранскиот, сирискиот и израелскиот воздушен простор од безбедносни причини.
„Виз ер“: Портпаролот на „Виз ер“ во јануари изјави дека компанијата го избегнувала ирачкиот и иранскиот воздушен простор.
„Затоа, некои летови кон запад од аеродромите во Дубаи и Абу Даби ќе мора да застанат (за полнење гориво и промена на екипажот) во Ларнака, Кипар или Солун, Грција“, рече претставникот.
