Поранешниот француски сенатор Жоел Герио е прогласен за виновен за дрогирање на колешка од парламентот со цел сексуално да ја нападне во својот стан во Париз. Шеесет и осумгодишниот Герио е осуден на четири години затвор, од кои 18 месеци ќе помине зад решетки. Тој поднесе жалба на пресудата, што значи дека нема веднаш да ја отслужи казната и ќе се соочи со ново судење подоцна.

Случајот што ја потресе француската јавност се случи во ноември 2023. Герио беше обвинет дека ставил екстази во чаша шампањ на 50-годишната Сандрин Жосо, пратеничка од редовите на центристичката партија МоДем. Жосо кажа дека дошла во неговиот стан за да го прослават неговиот реизбор за сенатор.

На судењето, Жосо изјави дека имала неправилно срцебиење и гадење и се мачела да стои исправено, но успеала да избега од станот. Ја опиша пресудата како огромно олеснување. Герио негираше дека имал намера сексуално да ја нападне Жосо. Тој рече дека направил многу сериозна грешка што ја послужил со пијалак зачинет со дрога.

„Навистина ми е жал за Сандрин. Никогаш не го сакав ова. Се надевам дека еден ден ќе ми прости“, кажа тој

Герио рече дека сипал екстази во прав во чаша ден пред нивната средба за да смири напад на паника, но потоа одлучил да не го земе и ја вратил чашата во плакарот.

„Накратко, јас сум идиот“, рече тој.

Државниот обвинител Бенжамин Кулон тврдеше дека Герио намерно ставил МДМА во шампањот на Жосо со цел да ја силува.