Општата болница во Охрид во изминатиот период го намали својот долг за околу еден милион евра со преземените мерки за рационализација на трошоците и подобро финансиско управување.

Стабилизирањето на дел од финансиската состојба на установата, според директорот Горан Маркоски, претставува важен чекор кон подобрување на функционирањето на болницата, обезбедување поквалитетни здравствени услуги и поголема сигурност за пациентите. Тој најави продолжување на активностите со цел дополнително намалување на обврските и долгорочна финансиска стабилност.

Најголемиот дел од долговите биле за набавки на медицински материјали и лекови.

„Точно пред година и половина долгот беше 170 милиони денари, нормално не може точно да се каже затоа што секогаш има тековни фактури и трошоци кои пристигнуваат. Во овој момент долгот изнесува 110 милиони денари или намален е за 1 милион евра кон побарувачите. Долговите се пред сѐ кон фармацевтските компании кон тие основни јавни набавки без кои болницата не би можела да функционира“, вели д-р Маркоски.

Паралелно со намалувањето на обврските, болницата минатата година инвестираше и во набавка на нова медицинска опрема за помодерна дијагностика и поефикасен третман, а раководството најави дека ќе следат активности на реновирање и репарирање на одредени одделенија.

„Во овој момент Одделението за лабораторија речиси е во завршна фаза на реконструкција и до средината на наредниот месец ќе добиеме едно од најсовремените одделенија за лабораторија во нашиот град со веќе набавената нова апаратура. Во моментов се реконструира надворешно, бидејќи објектот е стар и ништо не е сменето низ годиниве. Имаме проекти и за реконструкција на Нервното одделение, реконструкција и на Оделението за педијатрија, уредување на дворот и паркингот на установата, што исто така претставува еден голем проблем“, вели д-р Маркоски.

На Одделот за геријатрија во изминатиот период беше реализирано комплетно реновирање со замена на подовите, санација и уредување на ѕидовите, како и промена на дограмата.

С. ВРЕНЦОВСКА