САД му нудат на Иран целосно укинување на санкциите во замена за онеспособување на три нуклеарни постројки и претворање на Ормускиот Теснец во слободна поморска зона, според наводниот план од 15 точки што му бил доставен на Техеран. Планот засега не е официјално претставен, но големи делови од него се појавија во некои американски и израелски медиуми.

Иранската војска му порача на Доналд Трамп дека не прифаќа преговори со САД и негираше дека тие се во тек.

Според планот, Иран би добил помош од САД во развојот на цивилен нуклеарен проект за производство на електрична енергија, укинување на сите санкции и отстранување на заканата дека тие повторно би можеле да бидат воведени.

Израелската телевизија „Ченл 12“ објави што се бара од Иран. Тоа вклучува затворање и уништување на нуклеарните постројки во Натанз, Исфахан и Фордоу, размонтирање на сите постоечки нуклеарни капацитети и ветување дека никогаш нема да се стреми кон нуклеарно оружје, а Иран не би имал и право да збогатува ураниум на своја територија и би морал да ги предаде постоечките залихи.

Од Иран се бара да го отвори Ормускиот Теснец, кој би станал слободна поморска зона и да се откаже од поддршката за прокси групите во регионот, како Хезболах. За иранските проектили би се одлучувало подоцна, но би биле ограничени во број и дострел и би имале само одбранбена намена.

Трамп им рече на новинарите во Белата куќа дека „САД се во преговори со вистинските луѓе во Иран“ за да се стави крај на војната, додавајќи дека „Иранците многу сакаат да постигнат договор“. Иранската војска го отфрли тврдењето на Трамп дека САД разговараат со Техеран, велејќи дека Вашингтон преговара сам со себе.