Советот на јавни обвинители на денешната седница едногласно ја отфрли иницијативата на обвинителката Ленче Ристоска, која тврдеше дека врз нејзината професионална самостојност се вршат надворешни влијанија и притисоци. Ристоска во своето барање наведе дека нападите доаѓаат од политички структури на ВМРО-ДПМНЕ, а како пример ги посочи изјавите на премиерот и објавите на официјалната веб-страница на владејачката партија.

• ПО НАЈАВАТА ОД ВМРО-ДМПНЕ ЗА КРАЈ НА ОБВИНИТЕЛКАТА РИСТОСКА, ТАА ВЕЛИ ДЕКА Е ПОД ПРИТИСОК И ЗАПЛАШУВАЊЕ ЗАШТО КРИВИЧНО ГИ ГОНИ ПАРТИЈАТА И НЕЈЗИНИ ЕКСФУНКЦИОНЕРИ
• РИСТОСКА ГО ПРИЈАВИ ПРЕМИЕРОТ ПРЕД СОВЕТОТ НА ЈАВНИ ОБВИНИТЕЛИ ПОРАДИ НАЈНОВИТЕ НАПАДИ ПРОТИВ НЕА, ЌЕ РАЗГЛЕДУВААТ ДАЛИ ПОПЛАКАТА ИМА ОСНОВА

Членот на Советот, Маријана Илиевска, во образложението на одлуката кажа дека Комисијата утврдила оти јавните напади не се директно поврзани со конкретни дејства кои би ја загрозиле независноста на обвинителката. Според Советот, отсуството на индивидуализација на влијанието оневозможува да се утврди реално загрозување на нејзиното работење.

Иако премиерот ја нарече обвинителката „медиокритет со политичка матрица“, Советот зазеде став дека овие квалификации не претставуваат повреда на нејзиниот интегритет. Во заклучокот се вели дека таквите изјави не влијаат врз самостојноста на нејзиното одлучување во предметите.