Отимизмот дека војната на Блискиот Исток можеби е близу до крајот порасна денеска, при што клучниот пакистански посредник во Техеран и администрацијата на американскиот претседател Доналд Трамп изразија надеж за договор што би го отворил клучниот Ормуски Теснец.

Израелската влада вчера имаше седница за да разговара за евентуално примирје со соседен Либан, изјави висок израелски функционер, по повеќе од шест недели од почетокот на војната со Хезболах кој е поддржан од Иран. Двајца високи либански функционери изјавија дека биле информирани оти се во тек напори за примирје, но немаат дополнителни детали за тоа колку долго ќе трае или кога ќе биде објавено.

Трамп рече дека разговорите меѓу лидерите на двете земји ќе се одржат денеска, без да даде детали. Прекинувањето на борбите во Либан беше клучна пречка во претходните мировни разговори меѓу Иран и САД, заедно со нуклеарните амбиции на Техеран.

„Имаме добро чувство во врска со изгледите за договор“, изјави вчера портпаролката на Белата куќа, Каролин Ливит, на прес-конференција, и рече дека разговорите со посредство на Пакистан се „продуктивни и тековни“. Таа ги негираше извештаите дека САД официјално побарале продолжување на двонеделното примирје договорено од двете страни на 8 април. Повеќе разговори лице в лице сè уште не се потврдени, но веројатно повторно ќе се одржат во Пакистан, рече Ливит.

Пакистанската војска потврди дека шефот на армијата Асим Мунир пристигнал во Техеран. Висок ирански извор изјави за Ројтерс дека Мунир, кој посредувал во последната рунда разговори, ќе се обиде да „ги намали разликите“ меѓу двете страни.

Мохамед Еслами, шеф на Организацијата за атомска енергија на Иран, рече дека разговорите треба да ги признаат правата, интересите и достоинството на Иран за да бидат плодни.
„Но, ако се продолжи, како и обично, потпирајќи се на измама и, всушност, на недостаток на посветеност и непочитување на договорите и поставените услови, тогаш природно не може да се успее“, рече тој на провладин митинг во Техеран.

Трамп вчера изјави дека му рекол на кинескиот претседател Шји Џинпинг да не му дава оружје на Иран, иако Шји рече дека Кина не му дава оружје. Трамп, исто така, рече дека Кина е многу среќна што тој „трајно го отвора“ Ормускиот Теснец.

„Го правам тоа и за нив – и за светот“, напиша тој на социјалните медиуми, додавајќи: „Претседателот Шји ќе ме прегрне со голема, дебела прегратка кога ќе стигнам таму за неколку недели“.