Себастијан Саве испиша историја на Лондонскиот маратон, станувајќи првиот човек кој истрчал натпреварувачки маратон за помалку од два часа.

Триесетгодишниот Кениец постигна време од еден час, 59 минути и 30 секунди, повеќе од една минута побрзо од досегашниот рекорд на Келвин Киптум (2:00:35), поставен во 2023. На второто место заврши Јомиф Кејелча, кој исто така трчаше под два часа – 1:59:41, а и третопласираниот Џакоб Киплимо беше побрз од стариот светски рекорд – 2:00:28.

Елиуд Кипчоге беше првиот човек кој завршил маратон за помалку од два часа, но тоа не беше официјална трка и трчаше во контролирани услови.

„Се чувствувам добро. Пресреќен сум. Ова е ден за паметење за мене. Добро ја започнавме трката. Приближувајќи се кон финишот, се чувствував силно. Конечно стигнав до целта, го видов времето и бев толку возбуден“, изјави Саве, кој победи и минатата година.

Етиопјанката Тигст Асега го подобри светскиот рекорд во женска конкуренција, истрчувајќи време од два часа, 15 минути и 41 секунда.