Бившиот грчки премиер Алексис Ципрас потврди дека ќе формира нова политичка партија, која ќе биде промовирана на 26 мај, ставајќи крај на неколкумесечните шпекулации за неговото официјално враќање во политиката.

Порано овој месец, Ципрас објави долг политички манифест за тоа како левицата би можела да се врати во грчката влада, повикувајќи на обединување на социјалдемократите, радикалната левица и зелените.

„Не можев да останам во удобна тишина, туку имам одговорност да помогнам во враќањето на стабилноста и нормалноста во Грција. Потребна ни е владејачка левица, фокусирана на практични решенија, а не на несогласување. Не сум заинтересиран да водам партија со комплементарна улога, туку сакам да го преобликувам правецот на политиката“, кажа Ципрас на економски форум во април.

Следните парламентарни избори во Грција треба да се одржат во 2027.

Ципрас имаше 34 години кога стана лидер на Сириза во 2007 и под негово водство партијата напредуваше од 4,6% гласови на изборите во 2009 до 36,3% во 2015. Беше премиер од 2015 до 2019, во време на некои од најтурбулентните години од финансиската криза во земјата. Во 2023, Ципрас поднесе оставка од раководството на партијата по убедливиот пораз на парламентарните избори.