Уште еден дрон се урна во Летонија, во услови на зголемени тензии поради слични инциденти во Балтичкиот Регион, а растат стравувањата дека војната во Украина може да се прелее во соседните земји од НАТО. Беспилотното летало се урна во езерото Дриџис во општина Краслава, на околу 20 километри од белоруската граница, и експлодираше при ударот со површината на водата, соопшти денеска летонската полиција.
Во инцидентот, кој на властите им го пријавија локалните жители, нема повредени. Првично не беа дадени детали во врска со потеклото или видот на дронот. Полицијата соопшти дека на местото на несреќата се пронајдени остатоци од дрон, а на местото на несреќата е распореден персонал за итни случаи за да го истражи инцидентот. Вршителката на должноста премиерка Евика Силиња, која неодамна поднесе оставка поради инцидент со дрон, напиша на Икс дека е во контакт со надлежните органи и чека дополнителни информации. Таа ја повика јавноста да ги следи упатствата на властите.
Влегувањето на дронот во летонскиот воздушен простор не било откриено од радарските системи, според војската. Како резултат на тоа, до жителите на регионот не биле испратени известувања за мобилни телефони со предупредување за потенцијална закана за воздушниот простор, соопштија вооружените сили.
Летонија се граничи со Русија и Белорусија на исток. Земјата забележа пораст на инциденти со беспилотни летала поврзани со војната во Украина во последните месеци, заедно со другите балтички членки на ЕУ, Литванија и Естонија. За време на неодамнешните украински напади, залутани беспилотни летала постојано влегуваа во летонскиот воздушен простор, а некои се урнаа во земјата. На почетокот на месецов, празни резервоари во складиште за нафта во источниот град Режекне, на околу 50 километри од руската граница, беа погодени од два залутани украински дронови. Никој не беше повреден, но инцидентот предизвика политичка криза во која прво министерот за одбрана, а потоа и премиерот поднесоа оставка.
Москва ја обвини Летонија дека го става својот воздушен простор на располагање на Украина, тврдење што балтичката држава го негира.
