Тим чистачи со камери и приватен готвач, сите опремени со високотехнолошки апарати за снимање, доаѓаат во станови во Њујорк, каде што компаниите за вештачка интелигенција испраќаат бесплатен персонал за готвење и чистење директно на вратите на луѓето. Но, овие фирми за вештачка интелигенција собираат податоци за да ја обучат следната генерација роботи за готвење и чистење, поради што се снима секој сантиметар од станот што се чисти.

Иницијативата, наречена „Шифт“ од фирмата за вештачка интелигенција „Микро АГИ“, е дел од растечкиот број компании што ја развиваат следната генерација автономни роботи, за кои технолошките шефови се надеваат дека ќе можат да прават сè, од миење садови до тоа да служат како лични негуватели.

Бидејќи побарувачката за бесплатни чистења е толку голема, чистачите, обично студенти или штотуку дипломирани кои бараат работа, се стационирани во Њујорк на неодредено време, чистејќи околу пет станови на ден, пет дена во неделата. Единствената разлика помеѓу нив и обичниот чистач е што имаат вградени камери прикачени на нивните капи, поврзани преку кабел со нивните мобилни телефони. Главната цел на понудата е да се извршуваат задачи што бараат спретност, да се обучат роботите на иднината да ги користат своите раце. Како резултат на тоа, чистачите се интензивно фокусирани на своите раце додека ја извршуваат работата.

Камерата на капата на работникот од негова гледна точка ја покажува работата што ја врши чистејќи ја кујната. (Фото: Шифт)

Берџан Килич, основач на „Шифт“ вели дека целта на вежбата за собирање податоци е „да се унапреди човештвото“. Тој посочи на постојните модели на вештачка интелигенција како што е ЧетГПТ, кои се способни да создаваат реченици врз основа на претходно напишани текстуални пасуси достапни онлајн. Но, тој рече дека секоја кујна, дневна соба и алатка е малку поинаква, па затоа роботите ќе треба да бидат обучени да се прилагодат на престојот во различни простори и користењето на различни предмети. Најголемата тешкотија, вели Килич, е тоа што за да работат, неговите чистачи ќе треба да собираат „тони“ податоци.

„Во реалниот свет, секој објект е различен, осветлувањето е различно и ништо не е исто како што беше неколку часа претходно. Моделите треба да научат како нивните раце, камери и средини работат заедно“, рече тој.

Бизнис моделот на компанијата се потпира на тоа дека таа може да ги продава вредните податоци што ги собира од домовите на луѓето, анонимизирани, на компании а роботика и други фирми за вештачка интелигенција за обука на роботи. Килич вели дека „Шифт“ би можела да понуди и бесплатни или услуги со попуст што ќе ги покриваат „сите вештини што човештвото може да ги покаже“, истакнувајќи дека покрај чистењето станови во Њујорк, компанијата има и механичари што поправаат автомобили во Турција.

Се чини дека нема ограничување за тоа што хуманоидните роботи еден ден ќе можат да прават, особено што има и развој на роботи што ќе им помагаат на војниците на бојното поле.
Експертите за податоци и приватност ги предупредија потрошувачите да бидат претпазливи при нудењето на своите податоци – особено пристап до нивните домови – во замена за наводно бесплатни услуги.

Експертите и групи за заштита велат дека е забележано „загрижувачко зголемување на практиките ‘плаќање за приватност’ и ‘поткуп на податоци’ од компаниите“. Иако може да дојде со пари или услуга однапред, податоците што ги споделувате имаат начин да се вратат и да ви наштетат. Дури и ако му верувате на бизнисот што ги собира, секогаш постои ризик тие да ги споделат тие информации со други бизниси или влади, велат тие.

Додаваат и дека споделувањето податоци придонесува за „системи кои можеби не ги имаат вашите најдобри интереси на ум“. Технологијата што се развива врз основа на собраните податоци еден ден би можела да ги остави чистачите без работа. Предупредуваат дека дури и придобивката од бесплатно чистење на станови е „ситница“ во споредба со потенцијалниот профит што компаниите би можеле да ги остварат со собирање и продажба на вредни збирки податоци.