Четириесет лица се удавиле во последните пет дена во инциденти поврзани со топлотниот бран во Франција, изјави премиерот Себастијан Лекорну, додека температурите достигнаа рекордни нивоа во неколку поголеми градови, а топлотниот бран достигна врв во некои европски земји.

„Пливањето во ненадгледувани области за време на топлотен бран носи ризици. Премногу луѓе се обидуваат да се разладат во реките и каналите без нужно да ги земат предвид ризиците“, изјави министерката за спорт и млади Марина Ферари.

Меѓу жртвите е 13-годишно девојче, а еден млад професионален фудбалер е во критична состојба откако бил извлечен од реката Рона близу Лион.

Франција, Шпанија и Италија досега се најтешко погодени од топлотниот бран. Франција вчера ги забележа своите најжежок јунски ден и најжешка ноќ откако се вршат мерењата, со минимален просек од 21,6 степени, според „Метео Франс“, а над половина од земјата е во црвен аларм.

Во Шпанија, температурите достигнуваат над 40 степени во некои области, со црвен аларм во Андалузија на југ и Кантабрија и Баскија на север. Италија прогласи црвена тревога за топлотен бран во 15 градови, вклучувајќи ги Рим, Милано, Фиренца, Торино и Венеција.

Неколкумина луѓе се удавиле и во Германија, каде што се најавуваат температури до +40 на западот и југозападот на земјата.