Големи плочи асфалт, долги и широки по еден метар, ископа вчера силниот дожд во делови од улицата Дебарска во Битола, на која и претходно имаше големи улични дупки кои со месеци не беа закрпени.
„Под дождот буквално се распадна асфалтот, излегоа крпениците кои со години беа правени. Се откорнаа големи делови. Некаде и асфалтот е кренат. А дупките сега се долги и по неколку метри. Не е ни чудо, зашто дупките низ улицата беа толку големи што во последно време прераснуваа во депонии со ѓубре. Шахтите беа зафатени со смет“, велат жители од улицата.
Погодениот дел од Дебарска е токму во близина на улицата Козара, која повеќе од година уште не е асфалтирана, па додека трае нејзината обнова, дел од сообраќајниот притисок го трпат улиците Дебарска и Димитар Влахов, каде има големи дупки.
Ова е улицата за која САКАМДАКАЖАМ.МК во изминатите години објавуваше дека често при врнежите од дожд се поплавува од надојдената вода како да е река. Но, и потоа имаше нечисти шахти.
Од независната граѓанска иницијатива Поинаку, по ова објавија: „Со трибини и концерти во Офицерски, град не се гради! Резултатот на одделување милионски суми за култура е ова! Резултатот на клај ‘3 сантими место 15, ти е гајле, наш е надзоро’, е ова! Резултатот на ‘не можиме да ги тераме да чистат шахти, од партија ни се’, е ова!“
Градоначалникот Тони Коњановски на неговиот фејсбук-профил објави дека после силното невреме кое синоќа ја зафати Битола и околината со над наврнати 40 литри дожд на метар квадратен, екипи на јавните претпријатија „Нискоградба“, „Водовод“ и „Комуналец“ со својата оператива се на терен во санирање на штетите.
„Силните и интензивни врнежи помеѓу 22.00 и 01.00 часот направија оштетување на коловозот во дел од населбите Баир, Бадембалари, на улиците Дебарска, Бихаќ и Караорман. Дел од оперативата работи и на потегот Кравари и Бистрица. Заедно со директорите сум на терен со цел координирање и санирање на состојбите“, напиша Коњановски.
За состојбите со Дебарска, која подолго време не беше санирана, од Општина ни рекоа дека ќе ни одговорат во текот на денот.
Ж. ЗДРАВКОВСКА
