Советот на Општина Битола едногласно одлучи паркирањето на јавните паркиралишта во градот да биде бесплатно за родителите или старателите на лица од аутистичниот спектар. Тие ќе можат да користат повластена паркинг-карта за зоните Б1, Б2, Б5, Б7, Д1, Х1, А8, А10 и А2.

Картичката ќе важи една година и ќе му се издава на барателот по претходно поднесено барање. Таа нема да биде пренослива на други лица и возила.

Повластената паркинг-карта се издава на физички лица со регистрирано живеалиште или престојувалиште во Општина Битола и важи само за едно патничко моторно возило.

„Родителите или старателите на лица од аутистичниот спектар ќе можат да се обратат до Јавното претпријатие ‘Паркинзи’, каде што ќе треба да достават барање, фотокопија од лична карта, сообраќајна дозвола, наод и мислење за дијагнозата или МКФ-проценка, како и да потпишат изјава. Доколку ги исполнуваат условите, со нив претпријатието ќе склучи договор и ќе можат да користат бесплатно паркирање“, рече советничката од ВМРО-ДПМНЕ, Марина Крстиќ.

Таа најави дека наскоро ќе одржат средба со здруженијата на лица од аутистичниот спектар за да им ја објаснат постапката.

Ж. ЗДРАВКОВСКА