Една од најдобрите фудбалски кариери во историјата ќе биде крунисана без најголемиот трофеј откако Кристијано Роналдо и Португалија беа елиминирани во осминафиналето на Светското првенство во САД, Канада и Мексико по поразот од Шпанија од 1:0. Четириесет и едногодишниот Роналдо беше во солзи откако заврши неговиот мундијалски сон.

Тоа беше неговото рекордно, шесто светско првенство, а најблиску дојде до титулата на првото во 2006, кога Португалија беше поразена во полуфиналето. Роналдо претходно потврди дека ова е неговиот последен мундијал, но не и дали ќе продолжи да игра за репрезентацијата.

„Ќе се видам со семејството и ќе донесам одлуки со мирна глава“, рече тој.

Роналдо одигра 233 натпревари за Португалија и постигна 146 гола, од кои три на ова СП. Последната цел во кариерата сега му е бројката од 1.000 постигнати голови, а засега е на 976.

Меѓу неговите постигнувања се пет златни топки, пет титули во Лигата на шампионите и триумф на Европското првенство во 2016, но коментаторот на Би-Би-Си, Крис Сатон, грубо заклучи дека тој не направил ништо на ова СП.

„Тој се шеташе по теренот како дедо, затоа Португалија испадна. Кристијано Роналдо не прави ништо, тој не направи ништо“, рече Сатон.

И други го критикуваа селекторот Роберто Мартинез што инсистираше Роналдо да игра во првата постава на секој натпревар. Иако десетмина фудбалери постигнаа повеќе голови од Роналдо на овој Мундијал, само четворица имаа повеќе удари кон гол од неговите 18. Во исто време, тој создал само една шанса за своите соиграчи на петте натпревари, кои ги одигра речиси целосно, а дури 366 играчи повеќе пати ја допреле топката од него.

Дали Португалија ќе имаше поголеми шанси да го освои ова Светско првенство без притисокот Роналдо да биде стартер во секој натпревар, останува отворено за дебата.