Натпревар во копање гробови на унгарски гробишта можеби звучи како почеток на комична скеч-сцена. Сепак, настанот се покажа како нешто сосема поинакво кога вчера 38 натпреварувачи ги зедоа в раце крамповите и лопатите.

Унгарската асоцијација на одржувачи и оператори на гробишта го организира овој натпревар за да ја промовира професијата копач на гробови и потребните вештини, како и за да се разбијат табуата поврзани со смртта.

Сувата, од летото испечена земја на јавните гробишта во Њергешујфалу, во северна Унгарија, се покажа како сериозен предизвик за 19-те тимови составени од по двајца членови. Тие тешко дишеа и се потеа додека се натпреваруваа за титулата за најбрзо и најубаво ископан гроб.

„Брзината е најважна овде, а не убавината“, изјави Роберт Наѓ, кој победи заедно со својот соиграч Ласло Киш и поделија награда од 550 евра. „Кога треба да ископате гроб за погреб, мора многу да внимавате на точните димензии и да се погрижите тој убаво да биде обликуван“.

Нивното победничко време изнесуваше 1 час и 21 минута, при што гробот беше ископан според пропишаните димензии на натпреварот: длабочина од 1,6 метри, должина од 2 метри и ширина од 0,8 метри.