Европската Унија одобри помош за Украина во износ од нешто помалку од осум милијарди евра, што е најголемата поединечна исплата досега.
Од Брисел кажаа дека пакетот бил одобрен откако Киев спровел реформи во неколку области, вклучително и во правосудниот систем, борбата против корупцијата и енергетскиот сектор.
„Средствата треба да придонесат за стабилноста, закрепнувањето и модернизацијата, да овозможат непречено функционирање на јавната администрација во Украина и да ги поддржат реформските напори на земјата“, се наведува во соопштението.
Украина се соочува со сериозни финансиски тешкотии. Во октомври, Зеленски изјави дека на неговата земја ќе ѝ бидат потребни дополнителни 70 милијарди евра во 2027 година. Од почетокот на руската инвазија во февруари 2022, ЕУ има испратено повеќе од 235 милијарди евра буџетска и воена помош.



