Новите штипски советници и официјално ги добија уверенијата со кои што е верификуван нивниот мандат во наредните четири години. Од 23 советници, 12 се од СДСМ и коалициските партнери ДОМ, Достоинство и Партијата на пензионерите, а 11 се од ВМРО-ДПМНЕ и коалициските партнери ПОДЕМ, ГРОМ и Социјалистичката партија.

По осум години, СДСМ повторно ќе го има мнозинството во Советот и градоначалничката функција. На новиот градоначалник Благој Бочварски вчера Парламентот му ја констатираше оставка како пратеник и се очекува од утре да ја преземе новата функција што досега ја имаше Илчо Захариев.

Тој, пак, вчера ја имаше последната средба со вработените во локалната самоуправа, а до јавноста се обрати со соопштение во кое што се заблагодарува на граѓаните за досегашната соработка и истакнува дека Општината ја остава со сметка од 4.350.000 денари.

Се очекува брзо конституирање на Советот, а претседател најверојатно ќе биде доктор Ален Георгиев, кој беше носител на советничката листа на СДСМ. Новиот совет и новиот градоначалник на 8 ноември ќе го одбележат традицоналниот ден на ослободувањето на градот за кога се предвидени повеќе пригодни манифестации и свечена седница на Советот.

Т. ЈОВАНОВСКИ