Одложено беше и денешното рочиште од судењето на експремиерот Никола Груевски во предметот на СЈО „Насилство во Општина Центар“, бидејќи немаше камери во судницата.

Претходно, судијката Сафија Лаличиќ побарала за судењето за обид за убиство на поранешниот министер за здравство Никола Тодоров да се снима со камери во судница 1 и поради тоа, Груевски и останатите обвинети се качија во судница 12.

Но, бидејќи таа беше мала, а има голем број обвинети и сведоци во предметот, судијката Татјана Михајлова се консултираше со судот и ја доби судница 1, но Лаличиќ си ги зеде камерите од судница 1 и се пресели во помала судница, бидејќи во тој предмет има само еден обвинет.

Груевски и другите обвинети се симнаа во судница 1 и адвокатите побараа одложување. бидејќи немаше можност за тонско и визуелно снимање, а Михајлова го прифати барањето.

Следното рочиште е закажано за в среда. Претходно денеска беше одложено и рочиштето за предметот на СЈО „Траекторија“, каде што обвинет е, исто така, Груевски.

А. АНТЕВСКА