Обвинетиот експремиер Никола Груевски утрово не се појави на судењето за проневера и примање провизија за изградбата на кинеските автопати, случај на Специјалното јавно обвинителство (СЈО) именуван „Траекторија“. Само што се одложи судењето на кое се констатираше дека обвинетиот Груевски не го оправдал отсуството, тој се симна од автомобил и влета во Основниот суд Скопје 1, веројатно дополнително да објасни зошто не дошол навреме.

На минатото рочиште, кога задоцни Груевски обвинителката Фатиме Фетаи рече дека ако вака продолжи да не го почитува времето на судот, таа ќе бара стражарно да биде приведен.

Судењето освен поради неговото отсуство денеска се одложи и поради потреба од превод на дел од доказите што ги поднело СЈО.

С. К. ДЕЛЕВСКА