Наставник од основното училиште „Живко Брајковски“ во скопската општина Бутел вчера за време на наставата со дрвен стап истепал 13-годишен ученик од ова училиште. Министерството за внатрешни работи соопшти дека вчера во 16 часот добиле пријава од скопјанец дека неговиот 13-годишен син вчера околу 12.30 часот се здобил со телесни повреди на рацете и вратот, откако наставникот применил физичко насилство со употреба на дрвен стап.

„Веднаш по пријавувањето на настанот полициски службеници од полициската станица во Чаир излегле на местото на настанот. Известен е Јавен обвинител и се работи на целосно расчистување на случајот“, велат од МВР.

Министерството за образование и наука денес излезе со осуда за вчерашниот настан во ООУ „Живко Брајковски“.

„По добиените наоди од извршениот надзор од страна на Државниот просветен инспекторат, Министерството за образование и наука очекува соодветно санкционирање на наставникот. Веруваме дека секоја ситуација и конфликт може да се разреши по мирен пат, со разговор, а не со физички пресметки и напади. Штетата е уште поголема што не станува збор за инцидент помеѓу ученици, туку помеѓу наставник и ученик“, велат од МОН.

Министерството за образование апелира сите наставници и ученици проблемите да ги решаваат во присуство и со помош на психолошко-педагошката служба во училиштата, како и во присуство на родителите и раководните лица на образовната установа.