Фудбалерите на Мексико на неверојатен начин се пласираа во осминафиналето на Светското првенство во Русија, во што, по поразот од Шведска од 0:3, им помогна сензационалната победа на Јужна Кореја над актуелниот шампион Германија од 2:0.

Токму затоа, огромен број навивачи го славеа пласманот на Мексико пред амбасадата на Јужна Кореја во Мексико Сити, при што насобраната маса дојде да ја поздрави и генералниот конзул Ким Санд-Ил.

Во големата еуфорија, Ким се најде на рацете на пресреќните навивачи, кои му дадоа да се напие текила, пеејќи му дека Корејците сега се нивни браќа.

На прославата се вееја и заеднички мексиканско-корејски знамиња, а на Твитер имаше и такви кои ветија дека ќе почнат да слушаат корејски поп.

„Ти благодариме Кореја! Не знам точно каде се наоѓаш, но ти благодарам“, кажа 22-годишната студентка Сесилија Гонсалес.

И покрај големата победа, Јужна Кореја отпадна од Мундијалот, додека Мексико сега се среќава со Бразил.