Општина Центар го бележи кружниот тек во Дебар Маало, за да не се паркираат автомобили каде ќе стасаат. Утрово со хоризонтална сигнализација се бележеше кружниот тек, како и останатиот простор околу него наменет за пешаци. Сега во овој дел од Дебар маало имаше паркирани коли насекаде, но бидејќи не беше бележен често се случуваа и сообраќајки.

„На овој простор до сега се возеше кој како стаса. Сега ќе го изведеме според сите законски прописи односно кружниот тек ќе биде со една лента за движење на возила, а останатиот простор за движење на пешачи. Околу кружниот тек ќе ставиме и столпчиња за да не се паркираат коли“, вели Кире Секуловски, раководител на Секторот за уредување на градежно земјиште во Општина Центар.

Просторот кој ќе биде наменет за пешаци сега е означен со бели ленти кои означуваат дека тука е забрането паркирање. Дополнително за да се спречи паркирање на просторот за пешаци ќе се постават и клупи и корпи за отпадоци.

А. АНТЕВСКА