Голем пожар попладнево го зафати Потпелистерието, во атарот на селото Ротино. Екипите на Територијалната противпожарна единица од Битола излегоа на терен да гаснат, но поради засилениот ветер, пожарот бргу се прошируваше и претставуваше опасност да ја зафати моликовата шума.

Од Општина Битола соопштија дека имајќи ги предвид околностите дека се работи за тешко пристапен терен и покрај ангажираноста на противпожарните служби, јавните претпријатија на локално и државно ниво, надлежните служби за заштита, спасување и ЦУК, локализирањето и гаснењето на пожарот е исклучително тешко.

Состанок одржа и Кризниот штаб за заштита и спасување при Општина Битола под раководство на градоначалничката Наташа Петровска и донесен е едногласен заклучок дека е потребно ангажирање на Дирекцијата за заштита и спасување со активирање на „ер трактори“.

Во гаснењето вклучени се и противпожарно возило од РЕК Битола, од Општина Ресен, вработени во Националниот парк Пелистер, како и локалното население.

Од Противпожарната единица од Битола информираа дека во текот на денот имале шест противпожарни интервенции. Покрај големиот пожар во Ротино, екипите на терен гаснеле пожари во Ниже Поле, Драгожани, во Мариовскиот дел и во градското подрачје. Од таму се сомневаат дека пожарите се предизвикани од човечки фактор.

И во изминатите две недели во повеќе наврати гореше површина кај Ротино и Цапари крај регионалниот пат Битола – Ресен.

Ж. ЗДРАВКОВСКА