Германската канцеларка Ангела Меркел денес во Брисел рече дека ќе стори сѐ за да се одреди датум за почнување на преговорите со Северна Македонија за влез во ЕУ до октомври, откако Советот на министрите на ЕУ одлучи одредувањето датум да се одложи за три месеци, јави државната новинска агенција МИА од Брисел.

„Сѐ што е можно да направам, ќе направам за да се донесе позитивна одлука до октомври. Северна Македонија направи исклучителна работа со договорот од Преспа и за оваа одлична работа разговаравме вчера. Станува збор за неколку недели навистина, но нашата заложба останува и што се однесува до мене ќе ја употребам сета моја политичка тежина зад ова“, рече Меркел одговарајќи на новинарско прашање на МИА, на крајот на самитот на лидерите на Европската унија што се одржува во Брисел.