Покривот во Централното основно училиште „Тодор Ангелевски“ во Битола е во лоша состојба и прокиснува, па постои опасност ветрот да го отскрие објектот. Во истоименото подрачно училиште во Горно Оризари постои опасност од паѓање на таванот, па потребна е итна санација. Ова е само дел од лошата состојба што ја констатирала новата директорка на училиштето Љубица Стерјева, при примопредавањето на функцијата.
Во катастрофална состојба се и подрачните основни училишта во селата Горно Оризари и Стрелиште (Фото: СДК.МК)
Во извештајот што го испратила до Министерството за образование напишала дека врз зградата на Централното училиште каде учат 663 ученици, последната мала поправка била направена пред 14 години. Керамидите се стари и при промена на временските услови се кршат, па таванот прокиснува и е испукан. Во наставничкото веце постои опасност да се истури таванот во секое време. По секое врнење визбите се поплавуваат.
Дел од прозорците се искршени, а не се заменети со нови туку со иверица, па во тие училници нема доволно светлина. Голем дел од механизмите на прозорците се уништени. Клупите и столчината во лоша состојба, па потебно е нивно обновување, напишала директорката.
Училиштето не поседува тела за осветлување и рефлектори за кои има потреба во попладневната смена при одржување на наставата. Директорката исто констатирала дека во случај на пожар училиштето е небезбедно бидејќи нема хидрантска мрежа, а противпожарните апаратите воопшто не се сервисирани.
Во случај на пожар училиштето е небезбедно бидејќи нема хидрантска мрежа, а противпожарните апаратите воопшто не се сервисирани (Фото: СДК.МК)
За Подрачното училиште во приградската населеба Горно Оризари, каде учат 215 ученици, Стерјева исто така го информирала Министерството за образование дека е во катастрофална состојба. Напишала дека 38 стакла се целосно искршени и залепени со селотејп трака и картон. Влезната врата од училиштето целосно уништена, часовите по физичко образование се изведуваат во помошна просторија, а спортските терени и дворот имаат потреба од асфалтирање. Водоводната инсталација има потреба од целосна реконструкција.
Во другото подрачно училиште во населбата Стрелиште каде учат 66 деца, не само водоводната, туку и електричната инсталација е стара, па константно се јавуваат дефекти.
Ова е последица на лошата финансиска состојба во која десет години наназад се битолските училишта. Десетина основни и средни училишта во изминатиот период опстојуваа со блокирани сметки. Неодамна градоначалничката Наташа Петровска изјави дека проблемот со задолженоста на училиштата е посебно сложен и дека должат 4,5 милиони евра.
Пред неколку месеци, битолската јавност имаше можност преку новинарските извештаи да се запознае и со состојбата во средното медицинско училиште „Д-р Јован Калаузи“ во Битола, каде практично немаше ни една здрава врата, школскиот инвентар беше застарен, ѕидовите и подовите со дупки.
Во иднина, за надминување на состојбите неопходно е зголемување на блок дотациите што од државниот буџет се префрлуваат на општините за образованието и одговорно работење на раководните стрктури во образованието.
Ж. ЗДРАВКОВСКА
