Градоначалничката на Скопје Данела Арсовска со уште пет нејзини колеги се во неколкудневна студиска посета на САД на покана на Американската амбасада. Заедно со Арсовска во САД се и градоначалникот на Општина Кисела Вода Орце Ѓорѓиевски, на Општина Аеродром Тимчо Муцунски, на Битола Тони Коњановски, на Крушево Томе Христоски,, на Берово Звонко Пекевски и гостиварскиот градоначалник Арбен Таравари.
Тие веќе неколку дена се во САД, каде имаат повеќе средби за ефикасно управување со финансии и ресурси на локалната самоуправа. Како што стои во објавите на нивните фејсбук профили, „фокусот на работните средби во Стејт Департментот е борбата против корупцијата“.
Арсовска и градоначалниците од ВМРО-ДПМНЕ немаат објавено заеднички слики од средбите и состаноците. Единствено заедничка слика од сите градоначалници кои се отидени во САД објави градоначалникот на Крушево Томе Христоски.
„На состаноците стана збор и за најдобрите практики кои ги применуваат локалните власти во САД за јавно-приватни партнерства за да се подобрат капацитетите, при што беше нагласено дека постои простор за натамошно интензивирање на соработката помеѓу нашите пријателски држави, размена и примена на искуствата на САД во Македонија во борбата против корупцијата која е рак на македонското општество“, објави Арсовска на својата фејсбук страна по средбата со претставници на Стејт департментот во Вашингтон.
Градоначалниците покрај средби во Вашингтон ќе ги посетат и градовите Питсбург и Феникс каде, како што напиша Муцунски, ќе имаат средби со претставници на локалната власт, за размена на искуства и практики во делот на локалната самоуправа.
А. АНТЕВСКА
