БИТОЛСКАТА ГИМНАЗИЈА СЛАВИ 75 ГОДИНИ НАСТАВА НА МАКЕДОНСКИ ЈАЗИК, ДАЛА 18 АКАДЕМИЦИ, 6 ГРАДОНАЧАЛНИЦИ И 3 РЕКТОРИ

    БИТОЛСКАТА ГИМНАЗИЈА СЛАВИ 75 ГОДИНИ НАСТАВА НА МАКЕДОНСКИ ЈАЗИК, ДАЛА 18 АКАДЕМИЦИ, 6 ГРАДОНАЧАЛНИЦИ И 3 РЕКТОРИМеѓу академиците кои учеле во битолската Гимназија се и Михаил Петрушевски, Коле Чашуле, Петре Андреевски, Ѓорѓи Филиповски, Владо Камбовски, Ѓорѓи Чупона, Анте Поповски. (Фото: Б. Стојмирова/архива)

    Битолската гимназија „Јосип Броз Тито“ одбележува редок јубилеј – 75 години од одржувањето на првиот час на наставен македонски јазик во средно училиште во земјава. Темелите на средношколскиот образовен систем на мајчин јазик биле удрени во ова училиште, на 6 февруари 1945. За создавањето услови за почеток на наставата бил задолжен Крум Тошев, член на Комисијата за кодификација на македонскиот литературен јазик, а исто така коавтор на првиот „Македонски правопис со правописен пречник“. Работел на изработка на планови и програми, како и оспособување на зградата на Гимназијата за прием на нови ученици.

    Ова е едно од најстарите училишта во Македонија со континуиран образован процес цели 128 години, откако во 1892 година започнало да работи како нижа гимназија на турски јазик. (Архивска фотографија)

    На првиот Наставнички совет било одлучено средното училиште да се вика „Гоце Делчев“. По свеченото отворање, над 500 ученици започнале наставата на македонски јазик. Прв директор дил професорот по физика Ордан Печијаре, а работеле 16 наставници.

    Ова е едно од најстарите училишта во Македонија со континуиран образован процес цели 128 години, откако во 1892 година започнало да работи како нижа гимназија на турски јазик. За време на двете светски војни и периодот помеѓу наставата била на српски и бугарски јазик, но и покрај тоа станало упорише на македонски патриоти. Така, учениците во 1920 година без дозвола на управата зеле учество во изведба на драмата „Македонска крвава свадба“ на Војдан Чернодрински, по што биле казнети. Била формирана и илегална библиотека надвор од Гимназијата, каде биле добиени и првите литературни творби на македонски јазик „Бели мугри“ од Кочо Рацин и „Песни“ од Коле Неделковски. Се учеле на памет со чувство на голема национална гордост.

    За време на двете светски војни и периодот помеѓу наставата била на српски и бугарски јазик, но и покрај тоа станало упорише на македонски патриоти. (Архивска фотографија)

    Гимназијата е училиште со долга традиција, синоним за кавалитетно образование, добитник на бројни награди, признанија, одликувања. Од неа излегле дури 18 академици, 6 градоначалници, 3 ректори и конзули. Од изминатите генерации денес има успешни инженери, лекари, професори, писатели, уметници, научници… Меѓу нив се Михаил Петрушевски, Коле Чашуле, Петре Андреевски, Ѓорѓи Филиповски, Владо Камбовски, Ѓорѓи Чупона, Анте Поповски.

    „Традицијата на успешност Гимназијата ја негува и денес. При сите рангирања што ги изврши Државниот испитен центар, училиштето беше на прво или второ место, од вкупно 95 средни училишта. Ученици од Гимназијата учествуваа на Светската олимпијада на математичари и природни науки каде постигнаа значајни резултати. Училиштето веќе 15 години, секоја година се прогласува за севкупен победник во сите спортови меѓу средните училишта во Општина Битола, а во 2014 ја доби и наградата „Најуспешен училишен спортски клуб од средните училишта“ што ја доделува Владата“, рече директорката Фанија Наумовска.

    Јубилејот се одбележува со поголем број настани, кои започнаа со Ораторската вечер за значењето на македонскиот јазик менторирана од професорката Даниела Петорвска, продолжува со промоција на  училница опремена од ЕСМ подружница РЕК Битола и ќе заврши со Свечената академија вечерва во 18 часот во Народен Театар Битола.

    Ж. ЗДРАВКОВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира