Вработените во ЈСП Скопје најавија дека утре сабајле со семејствата ќе протестираат пред централата на јавното претпријатие ако денеска не им биде исплатена септемвриската плата. Како виновници за неисплатената плата, тие ги посочија скопската градоначалничка Данела Арсовска и директорот на ЈСП Александар Стојковски.
„Утре се договоривме да дојдеме со семејствата во 4.30 часот сабајле. Градоначалничката и Градот Скопје земаа плата, они се со полни стомаци, ние сме гладни. Денеска е 19-ти, кога ќе добиеме плата, кога ќе јадеме? И ние имаме деца како што она има деца и како што директорот има деца. Веќе отиде и октомври месец, немаме земено за септември“, изјави Африм Муча, претседател на независниот синдикат на возачите во ЈСП Скопје, на денешната прес-конференција.
За денеска велат дека ќе има автобуси, но тоа, како што кажаа, зависи од работата на полицијата која ги проверува сите автобуси поради дојава за бомба. За утре, пак, велат дека сè може да се случи.
„Ако не добиеме плата, утре нема да може да ги исполнуваме своите работни задачи. Извршителите веќе ни се на се врат. Децата ни бараат пари да си купат ужинка, фрижидерите ни се празни. Гладни сме“, велат вработените во ЈСП.
- ВМРО-ДПМНЕ ЗАКАЖА ВОНРЕДНА СЕДНИЦА НА ГРАДСКИОТ СОВЕТ ЗА АРСОВСКА ДА НАЈДЕ ПАРИ ЗА ПЛАТИ ВО ЈСП
- ДОЈАВАТА ЗА БОМБА ВО АВТОБУС СТИГНАЛА ОД ВРАБОТЕН ВО ЈСП СКОПЈЕ, СООПШТИ МВР
- ПОВЛЕЧЕНИ ОД СООБРАЌАЈ СИТЕ АВТОБУСИ НА ЈСП СКОПЈЕ ОТИ ДОБИЛЕ ДОЈАВА ЗА БОМБА
За најавениот протест, денеска пред Влада, од синдикатот на ЈСП велат дека не знаат кој го организира и додаваат: „За кого да протестираме пред Влада. Работникот не смее да се злоупотребува, ние си штрајкуваме за плата“.
Денешниот протест пред Владата го најави секретарот на Град Скопје Зоран Глигоров.
По барање на советничката група на ВМРО-ДПМНЕ за денеска е закажана вонредна седница на Советот на Град Скопје. Барањето на советниците на ВМРО-ДПМНЕ е да се пренаменат средства од буџетот за плати за вработените во ЈСП „Скопје“, а од синдикатот на вработените во ЈСП се надеваат дека на оваа седница ќе се најде решение за исплата на нивните плати.
