ДАНЕЛА ЦЕЛ МЕСЕЦ КРИЕЛА ОД ЕВРОПСКИТЕ БАНКИ И ЕУ ДЕКА ЈА РАЗРЕШИЛА РАКОВОДИТЕЛКАТА НА ПРОЕКТОТ ЗА ПРЕЧИСТИТЕЛНА СТАНИЦА, А НЕ ЗНАЕЛА НИТУ РАЗРЕШЕНАТА

    ДАНЕЛА ЦЕЛ МЕСЕЦ КРИЕЛА ОД ЕВРОПСКИТЕ БАНКИ И ЕУ ДЕКА ЈА РАЗРЕШИЛА РАКОВОДИТЕЛКАТА НА ПРОЕКТОТ ЗА ПРЕЧИСТИТЕЛНА СТАНИЦА, А НЕ ЗНАЕЛА НИТУ РАЗРЕШЕНАТАРаководителката на проектната единица на 18 мај добила решение од в. д. директорот на „Водовод и канализација“ Драган Илиевски дека на 20 април е разрешена од позицијата. (Фото: СДК.МК)

    Раководителката на проектната единица за пречистителната станица за отпадни води во Скопје од 200 милиони евра, еден месец била разрешена, а за тоа не знаела ни таа, ниту партнерите на проектот, двете европски банки и ЕУ. Од 200 милиони евра вредниот проект, 136 милиони евра се кредит од Европската инвестициска банка (ЕИБ) и од Европската банка за обнова и развој (ЕБОР), а 70 милиони евра се неповратен грант од Европската унија.

    Според документите во кои имаше увид САКАМДАКАЖАМ.МК, раководителката на проектната единица Линдита Шакири, која на оваа позиција е од стартот на овој капитален проект, на 18 мај добила решение од в. д. директорот на „Водовод и канализација“ Драган Илиевски дека уште на 20 април е разрешена од позицијата. За оваа одлука не биле консултирани ниту информирани Европската инвестициска банка (ЕИБ) и Европската банка за обнова и развој (ЕБОР). Тие како финансиери треба да дадат мислење и да го одобрат секое разрешување или ново именување на членови на проектната единица која го спроведува проектот. Но, не само што не го одобриле, туку не ни знаеле за разрешувањето. Тоа го дознале од раководителката која по службена должост им испратила е-пошта на соработниците од банките, во која ги информира дека веќе не е дел од проектот, како и дека службената е-адреса со информации и податоци за проектот ѝ е избришана.

    Раководителката, бидејќи не знаела дека е разрешена, цел месец работела на проектот, дури и го водела состанокот кој бил одржан на 11 мај и на кој присуствувале сите инволвирани, освен претставниците на Градот.

    Од разрешувањето на раководителката до денеска нема назначено нов раковидител на проектната единица и во моментов сите активности околу проектот се замрзнати бидејќи не се одржуваат состаноци меѓу партнерите.

    Токму разрешувањето без да бидат консултирани европските банки и тоа што нема нов менаџер на проектната единица е една од причините поради кои тие го откажале учеството на состанокот што требало да се одржи вчера. Во е-пошта испратена до Град Скопје и ЈП „Водовод и канализација“, европските партнери бараат да бидат известени за моменталната ситуација со кадарот во проектната единица и дека треба да бидат известувани за сите промени постојано, особено во оваа фаза кога проектот веќе може да стартува, бидејќи парите се обезбедени. Покрај забелешката дека на состаноците не се појавува никој од Град Скопје, тие информираат дека додека не ги добијат потребните информации од Град Скопје и „Водовод и канализација“ нема да се одржуваат редовните месечни и неделни состаноци.

    Договорот за изградба на пречистителната станица е потпишан минатиот месец со германската фирма „ВТЕ Васертехник“. Новата директорка на Германската стопанска комотра во Македонија Антје Ванделт денеска ни изјави дека не сака ништо да коментира во врска со проектот.

    „Да, информирани сме дека германска фирма е вклучена во проектот, но процесот не е целосно затворен и затоа ќе се воздржиме од коментар“, рече Ванделт.

    Од Град Скопје втор ден нема одговор на прашањата на САКАМДАКАЖАМ.МК дали е точно дека е сменет раководителот на проектната единица, зошто не се одржал вчерашниот закажан состанок кој бил закажан уште на 11 мај и дали добиле писмо од европските банки дека дека нема да учествуваат на идните состаноци. Наместо одговор добивме закана за тужба ако не го повлечеме текстот за 48 часа.

    А. АНТЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира