Паркот „Ибни пајко“ и пешачките патеките кај зградата на Филхармонијата о центарот на Скопје се затрупани со испаркирани коли и градежна опрема и механизација. Просторот меѓу Филхармонија, музичкото училиште „Илија Николовски-Луј“ и Факултетот за музичка уметност една година стои заграден со тараби, а направена е импровизирана улица за движење на градежна механизација за изгорениот објект на Инспекторатот за животна средина која е спроти нив.
Сега улицата е претворена во паркинг исто како и целиот простор околу Филхармонијата. Никој не го затвора влезот во овој дел за возила, па секој ден владее хаос. Наместо парк, како што беше замислата, овој простор е див паркинг.
Зградата во која беше сместан Инспекторатот четири години после пожарот стои разрушена и изгорена, и сè уште не е реновирана.
Вработените во музичкото училиште „Илија Николовски-Луј“ и Факултетот за музичка уметност во јануари годинава реагираа дека им е нарушена безбедноста на објектите и целосно и целосно е попречено функционирањето на овие институции.
„Во подрумските простории кои се веднаш под овој коридор се држи настава. Последиците од можна хаварија односно попуштање на слојот кој е предвиден за пешаци, а не за камиони се повеќе од реални. Веќе се чувствува нарушената статика во балетските сали кои се дел од училиштето ‘Илија Николовски-Луј’“, рекоа лани во реакцијата од Факултетот за музичка уметност, музичкото училиште „Илија Николовски-Луј“ и Филхармонија.
Зградата во која беше сместен Инспекторатот за животна средина се запали во 2020.
А. АНТЕВСКА
