Девет милиони денари ќе обезбеди Министерството за култура од државниот буџет за конзервација и реставрација на црквата „Св. Ѓорги“ во Курбиново, Преспа, која датира од 12. век и претставува бесценет културно-историски споменик. Според објавената Програма за поддршка на проекти за заштита на недвижно културно наследство за 2022, прифатени се два проекта за заштита на храмот. Едниот од пет милиони денари е за третата фаза од конзервацијата и реставрацијата на архитектурата и конструкцијата на црквата и уште четири милиони денари се за конзервација и реставрација на тамошното ѕидно сликарство.
Во 2020, црквата во Курбиново беше прогласена за културно наследство во опасност. Во изминатите години, ѕидовите на црквата на места беа распукани, а пожолтуваа и фреските, меѓу кои и ангелот на благовестието Гаврил, кој оттука е пресликан на македонските банкноти од 50 денари.
За Пелагониско-преспанскиот Регион, поголема сума пари е издвоена и за реализацијата на втората фаза од конзервацијата и реставрацијата на Сарајот на Нијази-бег во Ресен. каде што е сместен Домот на културата „Драги Тозија“. Со два милиона денари ќе продолжи реставрацијата на покривот почната минатата година.
Предвидени се и 600.000 денари за реставрација и конзервација на архитектурата и ѕидното сликарство во црквата „Св. Сотир“ во село Гопеш, Битолско, а за непосредна заштита на црквата „Св. Димитрија“ во Градешница, Мариово – 300.000 денари. Средства ќе се издвојат и за реставрација и конзервација на фасадите на спомен-куќите на Гоце Делчев и Стив Наумов во Битола. За одржување на археолошкиот локалитет Хераклеја Линкестис и за други значајни зафати ќе има 500.000 денари.
Ж. ЗДРАВКОВСКА
