ДВАЈЦА БРАЌА НА 26 И 21 ГОДИНА ПОЧИНАА ЕДНОПОДРУГО ОД КОВИД-19 ВО КАВАДАРЦИ

    ДВАЈЦА БРАЌА НА 26 И 21 ГОДИНА ПОЧИНАА ЕДНОПОДРУГО ОД КОВИД-19 ВО КАВАДАРЦИИ двете момчиња биле згрижени во Кавадаречката болница, од каде итно биле препратени на Инфективната клиника во Скопје. (Фото: СДК.МК)

    Двајца браќа од Кавадарци, на 26 и 21 година, починаа од последиците од ковид-19 едноподруго за три дена, потврди градоначалникот Митко Јанчев. И двете момчиња биле згрижени во Кавадаречката болница, од каде итно биле препратени во Скопје на Инфективната клиника, каде и починаа.

    „Двете момчиња имаа хронична хематолошка болест и фамилијарно оптоварување со нарушен имунолошки одговор што ги вклучува во категорија на најризични пациенти со можност од фатален исход од ковид-19“, велат од Клиниката за хематологија чии специјалисти биле вклучени во конзилијарниот тим на Инфективната клиника. Тие примиле најсовремена терапија и нега но, за жал, ниту конзилијарните напори не можеле да им помогнат да ги санираат компликациите од болеста.

    „Во услови кога уште не постои етиолошка терапија за ковид-19, главен фактор од кој зависи исходот на болеста е интегритетот на имунолошкиот систем на заболениот“, велат од Клиниката за хематологија.

    Градоначалникот Јанчев кажа дека 21-годишното момче почина денеска напладне, а пред 3 дена почина брат му.

    „За нивното здравје беа ангажирани инфектолози, доктори, хематолози кои несебично се грижеа за двајцата браќа. И покрај нивните напори момчињата починаа, тоа е трагедија и за семејството и за градот“, вели градоначалникот Јанчев.

    Нивни блиски кажуваат дека растеле само со грижа од таткото, без мајка, која рано починала.

    Вчера во Кавадарци беа регистрирани нови 15 ковид позитивни, вкупно досега има 585, а активни се 251.

    П. ПЕЧКОВ

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира