Град Скопје го повлече името на Али паша Јанински од листата за именување улици, плоштади, мостови и паркови. Оваа одлука е донесена на денешниот состанок на Комисијата за именување на улици, плоштади, мостови, по реакцијата на влашката заедница и Демократски сојуз на Власите во земјава, дека тоа е навредливо за нив бидејќи Али паша Јанински е личност која извршила геноцид врз Власите.
„Одлуката за повлекување на името на Али паша Јанински е донесена со цел никој во градот да не се чувствува засегнат или навреден од именувањето на улица или инфраструктурен објект“, велат од Град Скопје.
Али Паша (1741-1822) е феудалец од албанско потекло, паша на Јанина, кој се одметнал од централната отоманска власт и бил независен владетел на Албанија, Епир и Мореја, а потоа ја проширил својата власт и во Македонија, Тесалија и Грција. Поради суровоста во управувањето, влегол во народната традиција како беспримерен зулумќар. Али Паша е одговорен за уништување на Москополе и Грамос, двата наголеми влашки центри со развиена култура, академија, високи школи и трговија, што и било причина за масовното иселување на Власите низ цела Европа.
А. АНТЕВСКА
