Градоначалникот на Општина Прилеп Илија Јованоски од денеска почна да работи во прилепската болница за да им помогне на докторите во лекување на пациентите со ковид-19. Јованоски кој е специјалист ортопед за САКАМДАКАЖАМ.МК вели дека големиот број новозаразени, но и смртни случаи секој ден, го натерало да се приклучи на докторите во болницата во Прилеп.

„Иако не сум инфектолог сепак како доктор можам да помогнам и во медицинскиот и во организацискиот дел на работењето на болницата. Ќе работам во дневната болница каде се пациентите со полесна клиничка слика. Ќе доаѓам секој ден и откако сите пациенти ќе ја примат утринската доза на терапијата за ковид-19, ќе се вратам во Општината, а попладне повторно ќе дојдам во болница. Сега е време кога секој од нас треба да помогне на медицинскиот кадар во борбата со оваа пандемија“, вели градоначалникот Јованоски.

Вчера во Прилеп беа регистрирани 38 нови случаи на ковид-19, починаа три лица, а во градот има 762 активни случаи.

А, АНТЕВСКА