НЕМА КАЗНЕТИ ЗА БРОЈНИТЕ ДИВИ ДЕПОНИИ ВО ОХРИД И СТРУГА

    НЕМА КАЗНЕТИ ЗА БРОЈНИТЕ ДИВИ ДЕПОНИИ ВО ОХРИД И СТРУГАДива депонија на патот Струга-Калишта. (Фото: СДК.МК)

    Бројни диви депонии никнуваат во Охридско-Струшкиот Регион, оти жители секојдневно одлагаат најразличен отпад, градежен шут, па дури и непотребна покуќнина и мебел. Екипите на ЈП „Комуналец“ од Охрид дневно се расчистуваат и по неколку депонии во Охридскиот Регион, но проблем е што за кратко време повторно никнуваат нови.

    Дивите депонии со години се грда глетка и ја загадуваат животната средина оти нема инспекции и казни, сметаат граѓаните.

    „Зачестена е таквата појава, денес чистиме другиот ден повторно се прави депонија на истите критични точки кои се мапирани. Најчесто се подигнува кабаст отпад и градежен шут. Во таа насока, со цел решавање на тој проблем од страна на стручните служби е изготвен годишен календар за кревање кабаст и зелен отпад“, вели директорот Сашо Најдески.

    Неодамна во акција за чистење од водите на реката Грашница беше изваден мебел и покуќнина доволни за да се опреми еден стан; – Отпад во Охрид. (Фото: СДК.МК)

    Само во последните 4 месеци отстранети се околу 320 нестандардни депонии во Охрид и охридските села, од кои 19 големи диви депонии, а подигнати се околу 1.800 метри кубни отпад. Најчесто, дивите депонии никнуваат во населбите кои се во склоп на Националниот парк Галичица и крајбрежјето на Охридското Езеро, а неодамна во акција за чистење од водите на реката Грашница беше изваден мебел и покуќнина доволни за да се опреми еден стан.

    ЈП „Комуналец“ Охрид воспостави соработка со невладините организации и здруженија во регионот за заштита на животната средина, со цел едукација и подигнување на еколошката свест на населението.

    „Охрид заслужува да биде чист, Охрид е бисер на Балканот. Во таа насока се и моите заложби да ги исчистиме дивите депонии, но секако треба да се работи и на подигнување на еко-свеста на граѓаните“, додава Најдески.

    Од Комуналец апелираат граѓаните да го почитуваат календарот за подигнување кабаст и зелен отпад во градот и да не создаваат диви депонии.

    Општина Охрид реализира и акција за чистење на диви депонии на девет локации во која учествуваа сите општински јавни претпријатија, со луѓе и механизација, а дополнително беше ангажирана и механизација од  економските оператори со кои Општината има соработка. Собрани беа повеќе од 260 метри кубни отпад од секаков вид, а според најавите, вакви акции ќе се организираат и во иднина до целосно расчистување на дивите депонии кои веќе подолг период ги има низ Општина Охрид.

    Големи количини отпад има и пред влезот на Струга и на патот Струга- Калишта. Диви депонии има и на самиот брег од Езерото. И таму Јавното комунално претпријатие со чести акции за чистење се справува со неправилно одложениот отпад, но купиштата ѓубре и понатака се секојдневна слика во Струга.

    „Донесовме одлука сите инспектори да се на терен, бараме да се пронајдат сторителите и ќе следуваат и казни, а доколку не го отстранат шутот тоа ќе го направи Општината, но ќе бара да им се наплати на несовесните граѓани“, вели градоначалникот на Струга Рамиз Мерко.

    С. ВРЕНЦОВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира