Приватните лекари очекуваат и нивниот труд во справувањето со заразата од КОВИД-19 да биде вреднуван. Објаснуваат дека не сакаат награда како лекарите од јавното здравство која им ја додели Владата, туку редовна исплата на капитацијата. Пред некој ден ја добиле капитацијата за месец февруари, кажа денеска претседателката на Здружението на приватни лекари  д-р Лили Чолакова-Дервишова.

„Ја поздравуваме одлуката за награда за докторите од Инфективните клиники, инфективните одделенија и докторите од Итната помош, но не заборавајте на нас. Да потсетиме дека товарот од изминатиот период во справувањето со заштита од КОВИД-19 го понесоа и матичните доктори. Затоа не бараме награда, бараме еднаква динамика на плаќање со јавното здравство, месец за месец и да се израмниме со колегите од јавното здравство“, рече д-р Чолакова-Дервишова.

Почетоците на доцнењето на исплатата на капитацијата, која сега доцни 67 дена, започнала уште со воведувањето на приватното здравство во 1992, кога се задоцнило пет месеци. Таа додаде дека приватните лекари, околу 1.600 во земјава, сами си купиле опрема за заштита, маски, скафандери и дезинфициенси, се што е потребно за нивна заштита и заштита на пациентите во борбата со коронавирусот.

П. ПЕЧКОВ