СЕ НАЈДЕ ЛОКАЦИЈА ЗА НОВАТА МОНТАЖНА КОВИД БОЛНИЦА ВО ВЕЛЕС, НО ПАРИ ЗА ИНФРАСТУКТУРА ОПШТИНАТА НЕМА

    СЕ НАЈДЕ ЛОКАЦИЈА ЗА НОВАТА МОНТАЖНА КОВИД БОЛНИЦА ВО ВЕЛЕС, НО ПАРИ ЗА ИНФРАСТУКТУРА ОПШТИНАТА НЕМАЛокацијата е над хелиодромот, близу хируршките амбуланти и лево од Инфективното одделение на Велешката болница, но Општина Велес нема пари да го бетонира тлото и да се постави водоводна и канализациона мрежа, вели градоначалникот Аце Коцеввски. (Фото: СДК.МК)

    Во кругот на Велешката болница ќе се поставува монтажна болница која ќе згрижува пациенти позитивни на ковид-19, но локалната власт нема средства за да се изведат инфраструктурните зафати. Ова на денешната прес-конференција го објави градоначалникот Аце Коцевски, откако беше прашан дали е пронајдена локација каде ќе се постави новата монтажна болница, наменски за лица со коронавирусот.

    „Локацијата е позната, над хелиодромот, близу хируршките амбуланти и лево од Инфективното одделение. Според барањата на Министерството за здравство, општините треба да го бетонираат тлото, да се постави водоводна и канализациона мрежа, иако болниците не се во надлежност на локалната власт. За жал, немаме таква ставка во локалниот буџет, приходите се драстично намалени, се минимални. Треба да бараме начин за да ги обезбедиме овие средства. Ни се случи поплава, невреме, ангажирана е механизација која расчистува и тоа се непланирани трошоци. Дали ќе правиме ребаланс на буџетот или ќе се откажеме од некои локални инфраструктурни ветувања, ќе одлучиме“, рече Коцевски.

    Заради проширување на болничките капацитети, во 16 града ќе се формираат ковид болници за сместување, дијагностика и тријажа на пациенти со ковид-19, со цел да се одвојат од останатите пациенти. Во велешката монтажна болница предвидени се 32 кревети за сместување на исто толку пациенти.

    П. ПЕЧКОВ

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира