Седум години откако почна да се гради и една година откако беше завршена, шестоседната жичница на Попова Шапка конечно проработи и ги однесе првите скијачи до снежните терени на Шара. Таа минатата година беше свечено пуштена во употреба, но тогаш не проработе бидејќи недостасуваше обучен кадар за нејзино управување, а и немаше снег. Годинава снег има доволно, жичницата е целосно опремена, па дојдоа и министерот за економија Кресник Бектеши и новиот управител на „ЕЛЕМ турс“ Адем Авзиу за конечно да ја пуштат во употреба оваа највредна инвестиција на Шапка во последниве десет години.
„Убедени сме дека преку вакви инвестиции ќе привлечеме туристи не само од регионот, туку и од други држави. Така директво и индиректно може да се влијае врз локалниот економски развој и врз економијата на Северна Македонија“, изјави министерот Бектеши.
Што се однесува до најавената приватизација на туристичкиот центар Попова Шапка, тој рече дена сѐ уште се разгледуваат моделите по кои би се извршила.
„Ние најавивме дека ќе се формира комисија во која ќе бидат вклучени и невладини организации и различни институции. Досега завршивме со физибилити студија, како и ‘дју дилиџенс‘ студија за Попова Шапка. како предуслов да ја почнеме втората фаза. Еден од најдобрите модели е да се оди на јавно-приватно партнерство, каде ќе бараме приватен инвеститор, кој, заедно со државата, ќе инвестира во подобрување на условите на Попова Шапка“, рече Бектеши.
Ова е единствен шестосед во земјава. Должината на трасата е 1.500 метри, а за еден час може да пренесе 2.400 луѓе до скијачките терени на Шара. Цената за едно возење изнесува 150 денари.
Изградбата чинеше над девет милиони евра и уште од самиот почеток ја следеа проблеми. Првин имаше големи забелешки од експертите за трасата, па со употребата на механизацијата за изградба на столбовите беа преорани скијачите патеки кои тука поминуваа. Потоа при вршењето на градежните работи се оштети еден од главните извори од кои Тетово се снабдува со вода за пиење и кога конечно беше завршена, жичницата стоеше една година вон функција.
З. АНДОНОВ
