ШИЛЕГОВ ЈА ОДЛОЖИ ОДЛУКАТА „ШОЛЦ“ ДА ЈА ДОБИЕ „ДРИСЛА“ ДОДЕКА ЗАВРШАТ ИЗБОРИТЕ, ДОТОГАШ ГРАДОТ ЌЕ УПРАВУВА СО ДЕПОНИЈАТА

    ШИЛЕГОВ ЈА ОДЛОЖИ ОДЛУКАТА „ШОЛЦ“ ДА ЈА ДОБИЕ „ДРИСЛА“ ДОДЕКА ЗАВРШАТ ИЗБОРИТЕ, ДОТОГАШ ГРАДОТ ЌЕ УПРАВУВА СО ДЕПОНИЈАТАШилегов кажа дека за неправилностите со доделување на концесијата на „ФЦЛ Амбиенте“ биле известени надлежни органи, предадена е целокупната документација и според неговите информации истрагите кои се водат се во завршна фаза. - Шилегов на „Дрисла“ во април лани. (Фото: Ѓ. Личовски)

    Одлуката германски „Шолц“ да ја добие депонијата „Дрисла“ ќе биде донесена после изборите. На денешната седница на Советот на Град Скопје градоначалникот Петре Шилегов предложи одлуката да се одложи бидејќи е изборна кампања и не сака да има никаква дамка во изборот на „Шолц“ за нов концесионер.

    „Недвосмислена е одлуката дека Градот треба да го има ’Шолц‘ за концесионер на депонијата. Се појавија дилеми дали може да се донесе одлука за доделување на концесија за време на изборна кампања. За да избегнеме било какви контроверзи и да нема било каква дамка на овој Совет и ова раководство на Град Скопје, барам седницата да се прекине и да се стави на дневен ред веднаш штом Држваната изборна комисија каже дека изборите се завршени“, рече Шилегов.

    Додека биде направен изборот на нов концесионер, со депонијата ќе управува Град Скопје, а не италијанската фирма „ФЦЛ Амбиенте“. Шилегов рече дека имаат правна основа да ја преземат „Дрисла“ оти според судската пресуда поништен е изборот со кој италијанската фирма „ФЦЛ Амбиенте“ беше избрана за концесионер и со тоа Градот може да ја преземе целосно.

    „Ако алибито на италијанците за неинвестирање на депонијата било дека се води судска постапка тогаш не требало воопшто да влезат во ’Дрисла‘. До сега ако се придржувале на договорот требало да инвестираат 60 милиони евра во депонијата. Во изминативе 7 години депонијата работи исклучиво со средствата кои Градот ги вложува“, рече Шилегов.

    Шилегов кажа дека за неправилностите со доделување на концесијата на „ФЦЛ Амбиенте“ биле известени надлежни органи, предадена е целокупната документација и според неговите информации истрагите кои се водат се во завршна фаза.

    Мината недела Комисијата формирана од градоначалникот Петре Шилегов изврши бодување на трите фирми кои на тендерот објавен во 2011 година доставиле понуди и влегле во втората фаза, а тоа се италијанската „ФЦЛ Амбиенте“, германската „Шолц“ и австриската „АСА“. Според бодувањето на Комисијата најдобро рангирана била германската „Шолц“. Од декември 2016 година, „Шолц“ е во целосна сопственост на „Чихо Енвајрментал Груп“, една од најголемите кинески компании за рециклирање.

    А. АНТЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари