Локалната власт донесе одлука неколку фреквентни локации во Штип да имаат бесплатни паркинзи. Од денеска се укинува плаќањето паркинг на улицата Сутјеска во населбата Автокоманда, која е една од најфреквентните во градот со оглед на тоа што таму се наоѓа и новиот градски пазар.

Во Штип од лани се воведе платено паркирање со СМС порака, а минатата недела се воведени и грепки (Фото: СДК.МК)

Според градоначалникот на Штип Благој Бочварски, се укинува плаќањето паркинг на сите улици околу градскиот пазар, што ќе значи големо олеснување на земјоделските производители од регионот кои секојдневно, а посебно во четврток и петок, доаѓаат на пазар во Штип. Олеснувањето ќе биде и за самите штипјани кои пазарните денови масовно го посетуваат пазарот. Се укинува и платениот паркинг на некои улици околу Клиничкиот центар во Штип, а за подобар проток на возила на некои улици се укинува паркирањето.

Во Штип од лани се воведе платено паркирање со СМС порака, а минатата недела се воведени и грепки.

Останува плаќањето на паркинг просторот само во централното градско подрачје, по улиците околу реката Отиња каде сообраќајот е еднонасочен. Општината веќе иницира измена на режимот на сообраќајот со враќање на двонасочен сообраќај, а паркирањето ќе се решава со изградба на паркинг простор на постојниот тротоар, а за пешаците ќе се градат патеки над коритото на реката Отиња.

Т. ЈОВАНОВСКИ