Со вклучување на сирена утре во 17 часот пред Клиничката болница во Битола ќе има протест поради смртта на новороденчето кое завчера почина на Одделениетие за гинекологија и 5-годишната Јана Христовска која умре на 22 март на Педијатриското одделение во болницата.

„Ќе носиме сирена, ќе ја вклучиме а потоа ќе одадеме една минута почит за сите прерано заминати чеда, родители и пријатели и ќе си отидеме… Нека сирената ја означи алармантната сотојба во болницата, а молкот нека биде за наш потсетник за тие на небесата, оти сите немо седиме и чекаме промените од небо да паднат, а не ние да ги створиме час поскоро за да спасиме нечии живот“, најави Игор Петковски, кумот на Јана.

Новороденчето почина во неделата, а министерот Фатмир Меџити при посетата на Клиничката болница рече дека според првичниот извештај, бебето било живо родено со брадикардија и имало белодробно срцево оживување.

Денес треба да започне вонредниот инспекциски назор од Државниот здравствен и санитарен инспкеторат (ДЗСИ) за да се утврдат причините за смртта на новороденчето. Ова за нецел месец е втор ваков надзор, по смртта на 5-годишната Јана Христовска кога инспекторите не утврдија лекарска грешка при лекување на девојчето. Сепак, и по три недели, уште нема резултати од обдукцијата.

По двете трагедии, директорот на болницата Александар Обедниковски најави дека денеска ќе си поднесе оставка од морални причини.

Ж. ЗДРАВКОВСКА