Некогашното излетничко место Спортско-рекреативен центар (СРЦ) „Сарај“ во Скопје повторно е полно со посетители, особено за време на викендите. Но, сегашната слика не е истата како пред четириесетина години, кога во паркот вриело од народ поради големиот број спортско-рекреативни и забавни содржини кои ги имало. Зеленилото во паркот се одржува, но рекреативните содржини и објекти кои го правеле целосен овој комплекс се заборавени и пропаѓаат.

Паркот го одржува ЈП „Паркови и зеленило“, а изминативе три години поставени се и нови рекреативни содржини. (Фото: Ѓ. Личовски)

СРЦ „Сарај“, кој се наоѓа меѓу реките Вардар и Треска, беше најпознат по големиот олимписки базен со скокалница, како и по спортските терени за фудбал, кошарка, ракомет и одбојка. Веќе со години, ниту базенот ниту терените не се во функција. Базенот е целосно распаднат, обраснат со треви и запуштен. Терените за кошарка и ракомет се без кошеви и голови односно останат е еден рѓосан кош со искината мрежа. Единствено во функција е фудбалскиот терен околу кој имало атлетска патека за трчање, која пак сега едвај се гледа.

Паркот го одржува ЈП „Паркови и зеленило“, редовно се коси зеленилото, се чисти ѓубрето, а како што велат од претпријатието изминативе три години поставиле нови рекреативни содржини за тој да биде привлечен за посетители.

Зеленилото во паркот се одржува, но рекреативните содржини и објекти кои го правеле целосен овој комплекс се заборавени и пропаѓаат. (Фото: Ѓ. Личовски)

„До пред три години кога Градот доби нови раководство, овој парк не беше одржуван, беше затрупан со ѓубре и обраснат со треви. Ние изминативи три години, покрај тоа што редовно го одржуваме и чистиме, поставивме и два нови летниковци, дрвени клупи и маси, корпи за отпадоци, ги офарбавме и поправивме железните клупи и поставивме комплетно ново осветлување. Изграден е и парк за миленици, а засадени се и околу 350 нови садници“, вели директорот на ЈП „Паркови и зеленило“ Ардијан Муча.

Од Град Скопје велат дека содржините во СРЦ „Сарај“ како што е базенот, не се под нивна надлежност туку на државата, но дополнуваат дека ќе го актуализираат прашањето за целосно уредување на овој простор и враќање во функција на содржините кои сега се заборавени и оставени да пропаѓаат.

Спортските терени за кошарка и ракомет не се во функција. (Фото: Ѓ. Личовски)

СРЦ „Сарај“ е едно од најстарите излетнички места во Скопје, со површина од 240.000 метри квадратни. Според податоците од ЈП „Паркови и зеленило“, изграден е во 1948 кога бил предвиден и со урбанистичкиот план како регион Сарај-Матка, исполнет со базени, фудбалски игралишта, трибини и патеки. Подоцна, регионот Сарај-Матка прераснува во центар за спорт и рекреација со терени за спорт покрај реката Вардар и езерото Треска. Во 1955, урбанистичкиот план е ревидиран и е изграден базенот, фудбалските игралишта и другите објекти за рекреација. Во 1964 е направен нов урбанистички план, со кој биле испланирани јавното зеленило и спортско-рекреативните реони. Додека во 1971, од „Паркови и зеленило“ е направен проект за Спортски центар „Сарај“, со кој се дефинирани градското и вонградското зеленило, со паркови, плоштади и други зелени површини по бодовите на Скопје – вонградското зеленило, како и зеленилото за активна и пасивна рекреација.

А. АНТЕВСКА