УАПСЕН ДИРЕКТОРОТ НА СКОПСКАТА ЗООЛОШКА И 5 ВРАБОТЕНИ КОИ ЗАКЛАЛЕ 12 КОЊИ И ЕДНА МАЗГА, А МЕСОТО ГО ДАЛЕ НА ЖИВОТНИТЕ ВО ГРАДИНАТА

    УАПСЕН ДИРЕКТОРОТ НА СКОПСКАТА ЗООЛОШКА И 5 ВРАБОТЕНИ КОИ ЗАКЛАЛЕ 12 КОЊИ И ЕДНА МАЗГА, А МЕСОТО ГО ДАЛЕ НА ЖИВОТНИТЕ ВО ГРАДИНАТАПолициски службеници ги затекнале лицата како ги колат коњите и месото го спремаат за храна за животните; - Директорот Стаменов. (Фото: ЗОО)

    Министерството за внатрешни работи го уапси директорот на скопската Зооолошка градина Кристијан Стаменов. Од МВР е поднесена кривична пријава до Основното јавно обвинителство против директорот Стаменов и уште 5 лица вработени во градината поради колење коњи.

    Како што соопштија од МВР, вчера (14.07.2022) во 18 часот, полициски службеници од Одделот за криминалистичка полиција при МВР и Одделението за криминалистички работи Карпош, лишија од слобода 5 лица, и тоа Д. М. (25), А. М. (43), М. Х. (45), В. Г. (46), вработени во Зоолошката градина во Скопје и З. Р. (44), надворешен соработник.

    „При извршена обиколка на Зоолошката градина, по претходно добиени сознанија, тие биле затекнати во помошните простории на Зоолошката градина односно во кујна за подготвување храна за животните, како подготвуваат храна од коњи (12 коњи и една мазга) кои ги колат на лице место за месото да го употребат како храна за дивите животни во Зоолошката градина“, велат од Министерството.

    МВР вели дека лицата се приведени во полициска станица, каде дополнително бил повикан и К. С. (35), директор на Зоолошката градина, со кого бил извршен службен разговор. На лице место излегле и инспектори од Агенцијата за храна и ветерина, кои констатирале неправилности во постапката и го одзеле месото.

    Стаменов вчера за САКАМДАКАЖАМ.МК изјави дека добиле 16 коњи од Агенцијата за запленет имот, при акции за фаќање дрвокрадци и шверцери, но десет од нив биле многу болни и затоа било решено тие да бидат заклани. Постапката, вели тој, е согласно законите и правилата за третман на животни, а известена е и Агенцијата за храна и ветеринарство.

    По објавувањето на информацијата во медиумите градоначалничката Данела Арсовска го разреши од функцијата директорот Стаменов.

    А. АНТЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира