Државната изборна комисија (ДИК) се уште работи на теренската проверка на спорните гласачи. За САКАМДАКАЖАМ.МК Комисијата потенцираше дека “постојано работи на обработка на спорните гласачи, но засега нема нови информации околу проверката”
Претседателот на ДИК Александар Чичаковски, на завчерашната јавна седница, рече дека нема да го потпише Избирачкиот список ако остане и еден спорен гласач. Тој апелираше сите институции да соработуваат со ДИК за да може членовите на Комисијата да дадат попрецизна проценка за тоа дали може да има прочистен Избирачки список.
Според последните информации од ДИК, од 87.128 лица кои теренски беа проверувани, 37.435 лица не биле пронајдени дома.
Попладнево на состанок на претседателот на СДСМ, Зоран Заев и коалициските партнери едногласно било одлучено опозицијата да не ги повлече своите членови од Државната изборна комисија.
„СДСМ и партнерите се одлучни дека на 5 јуни не се возможни избори, ниту пак ќе учествуваат на таквите нерегуларни избори. Но СДСМ и коалициските партнери ќе го обезбедат своето присуство и контрола на процесот на прочистување на избирачкиот список, со цел да ги спречат манипулациите и злоупотребите што се обидува да ги прави власта на Никола Груевски“, се вели во соопштението што попладнево го објави СДСМ.
