Новата сала на Македонската филхармонија денес претпладне ја доби дозволата за технички прием, и со тоа, вечерва во 20 часот, свечено и официјално ќе почне новата сезона.
Објектот на Филхармонијата, без технички прием на 21 мај го отвори претседателот на Македонија, Ѓорѓе Иванов и тогашната власт на ВМРО-ДПМНЕ, на чело со премиерот Емил Димитриев, министерката за култура Елизабета Канческа- Милевска и директорката Маја Чанаќевиќ.
Концертот за вечерашниот старт е симболично насловен „Нов почеток“, ќе диригира Борјан Цанев , а пијанистот Дино Имери ќе го свири еден од најпопуларните концерти за клавир и оркестар од Чајковски, бр 1.
Вториот дел од програмата е посветен на „Римски фонтани“ од Респиги и „Ѓаволштините на Тил Ојленшпигел оп.28“ од Рихард Штраус. Вечерашниот концерт е распродаден.
Идејното решение на новата зграда е на архитектот Виктор Михајлов, а пак ентериерот е на српскиот архитект Зоран Ѓорѓевиќ ( Фото: Ѓ.Личовски)
В.д директорот на Филхармонијата Виктор Илиески и министерот за култура Роберт Алаѓозовски, денес ги прошетаа медиумите низ новиот објект каде финишираа подготовките за вечерашната свеченост.
Илиески повтори оти иако е познато дека дека салата беше свечено отворена на 21 мај, тоа , како што рече, повеќе наликуваше на парада за сликање, а објектот не беше завршен,и затоа тој како директор ја превезема одговорноста за доцнењето на новата концертна сезона која требаше порано да почне.
Малата сала е мултифинкционална, седиштата може да се склопат доколку сцената се користи за театарски или балетски претстави (Фото : Ѓ.Личовски)
За свеченото отворање беа во функција само два тоалета за гостите, два тоалета за музичарите и неколку гардероби. Објектот целиот не е во функција, на малата сала уште се работи, а во неделата за момент беа тргнати скелињата во меѓупросторите.
Според Алаѓозовски , долгот од 15 милиони евра на Министерството за култура кон австриската фирма „Штрабаг“ која ја градеше зградата ќе се плаќа етапно.
Идејното решение на новата зграда е на архитектот Виктор Михајлов, а пак ентериерот е на српскиот архитект Зоран Ѓорѓевиќ.
Има голема сала од 960 седишта плус седиштата на двата балкони, а пак малата сала има 312 седишта.
Малата сала е мултифинкционална, седиштата може да се склопат доколку сцената се користи за театарски или балетски претстави.
Во новата сала има поставено 63 камери (Фото : Ѓ.Личовски)
На приземјето има гардеробери за 1.000 гости, а на првиот спрат, за 200.
Влезовите и за малата и за големата сала се на првиот спрат, а може да се влезе и од вториот спрат.
За лицата со хендикеп има патека, како и лифтови.
Министерот за култура Роберт Алаѓозовски и в.д директорот на Филхармонијата Виктор Илиески денес пред финалните подготвки за свеченото отворање (Фото: Ѓ.Личовски)
Вработените во Филхармонијата велат дека во моментов поседуваат најмодерна опрема за снимање на концерти и албуми, која е сместена во студиото на приземјето.
Секоја група на музичари, дали се кларинети, флејти, имаат посебна соба за вежбање, а има и 10 индивидуални простории за проби.
Секоја соба има директен приклучок во студиото за потребите за снимање.
Билетарницата е на првиот спрат, од кај страната на Средното музичко училиште.
Преносот од вечерашното отворање ќе оди во живо на Македонската радио и телевизија.
Б.НЕСТОРОСКА
